Kisitsisitigut paasissutissani matumani suliffissaaleqisut aamma sulisinnaasut agguaqatigiissillugu qaammammut ineriartornerat nassuiarneqarput. Sapinngisamik FN-ip ataani The International Labour Organisation-imit (ILO) innersuussutit tunngavigalugit suliarineqarput. Erseqqissaatigineqassaarlu Naatsorsueqqissaartarfiup qaammatikkaartumik saqqummiuttagaanit suliffissarsiortutut nalunaarsukkat kisitsisaannit matumani kisitsisit allaanerummata.
Saqqummersitaq immikkoortunut pingasunut avinneqarpoq, ataatsimut imaluunniit immikkut atuarneqarsinnaasunut. Immikkoortumi siullermi suliffissaaleqineq nassuiarneqarpoq. Immikkoortut aappaanni sulisinnaasut kiisalu immikkoortut pingajuanni kisitsisitigut paasissutissani najoqqutarineqartut naatsorsuinermilu periaatsit nassuiarneqarlutik.
Naatsorsueqqissaartarfiup kisitsisaataasiviani bank.stat.gl –imi piffissami 2016-imiit 2024-mut suliffissaaleqisut sulisorineqarsinnaasullu paasissutissaat sukumiinerusut nassaarineqarsinnaapput. Immikkoortumi siullermi tullianilu titartakkat takussutissiallu tamarmik Naatsorsueqqissaartarfiup kisitsisaataasivianit kisitsisit atorlugit sananeqarput. Kisitsisaataasivimmit kisitsisinut najoqqutarineqartunut innersuussinerit titartakkat takussutissiallu ataanni takuneqarsinnaapput.
Taaguutit nassuiaataat
Suliffeqarneq: Agguaqatigiissillugu qaammammut suliffillit amerlassusaat.
Suliffissaaleqineq: Agguaqatigiissillugu qaammammut suliffissaaleqisut amerlassusaat.
Suliffissaaleqineq pct.-inngorlugu: Suliffissaaleqineq sulisinnaasut amerlassusaannut tamakkiisumut naleqqiullugu.
Sulisinnaasut: Innuttaasut najugaqavissut suliffillit imaluunniit suliffissaaleqisut ukiunik inuussutissarsiorfiusinnaasunik ukiullit.
Ukiut inuussutissarsiorfiusinnaasut: 18-init 64-inut (2016-imi), 18-init 65-inut (2017-imiit 2020-mut) aamma 18-init 66-inut (2021-mi 2024-milu).
Sulisinnaasunut ilaanngitsut: Innuttaasut najugaqavissut ukiunik inuussutissarsiorfiusinnaasunik ukiullit, suliffilittut imaluunniit suliffissaaleqisutut nalunaarsorsimanngitsut.
Saqqummersitami matumani naqqiissutit
Suliffeqarnermut tunngasuni naqqiissuteqarnermi siuliani saqqummertunertuni allannguuteqartoqarpoq. Suliffeqarnermut tunngasuoq saqqummersitaq www.stat.gl –imi takuuk.